Shorti i Botërorit 2026 u zhvillua në Uashington mes spektaklit dhe pritshmërive të mëdha, ndërsa Shqipëria dhe Kosova, edhe pse ende në fazën e play off-it, u përfshinë zyrtarisht në vazon e katërt të turneut të zgjeruar me 48 skuadra. Ceremonia, e hapur nga Andrea Bocelli dhe e ndjekur nga një sërë personalitetesh të futbollit dhe politikës, përcaktoi bazën e 12 grupeve të Kupës së Botës 2026, ndërsa goglat e fundit do të plotësohen nga fituesit e playoff-eve europiane dhe ndërkontinentale. Shqipëria ndodhet në Playoff B përballë Ukrainës, Suedisë dhe Polonisë, ndërsa Kosova në Playoff C kundër Turqisë, Rumanisë dhe Sllovakisë. Formati i ri i FIFA-s synon ekuilibër dhe shmangien e përballjeve të parakohshme mes fuqive botërore, duke e bërë këtë short një nga më strategjikët në historinë e Kupës së Botës. Pavarësisht rrugës së vështirë drejt kualifikimit, të dy kombëtaret shqiptare kanë shpresë reale, ndërsa përfshirja e tyre në short është një moment historik për futbollin e rajonit.

Kosova ka kaluar Shqipërinë në renditjen e koeficienteve të UEFA-s për futbollin e klubeve, duke u ngjitur në vendin e 34-të ndërsa Shqipëria zbret në pozicionin e 46-të. Rezultatet e klubeve kosovare në Europë — Ballkani, Drita, Llapi dhe Malisheva — krijuan një bazë të fortë pikësh, ndërsa ekipet shqiptare u ndalën në paraqitje minimale. Diferenca tregon qartë dy realitete: Kosova investon me strategji, stabilitet dhe ligj sponsorizimesh që funksionon, ndërsa Shqipëria mbetet peng i kaosit, mungesës së vizionit dhe drejtimit të vjetër institucional. Rezultati është i pashmangshëm: Kosova rrit cilësinë dhe ecën përpara në Europë, ndërsa Shqipëria ngec nën hijen e Armand Dukës.

Milan fitoi 1-0 derbin ndaj Interit falë pritjeve vendimtare të Mike Maignan dhe një goditjeje të saktë të Pulisic, duke kaluar në vendin e dytë dhe duke e çuar Interin në krizë reflektimi. Zikaltërit humbën një penallti me Calhanoglun, ndërsa kuqezinjtë regjistruan derbin e gjashtë radhazi pa humbje. Në ndeshjet e tjera, Roma, Lazio dhe Parma siguruan fitore të rëndësishme në një kampionat që ngushtohet në vetëm tre pikë diferencë mes pesë ekipeve të para.

Franco Baresi është rikthyer në Casa Milan, tre muaj e gjysmë pasi klubi njoftoi se kapiteni historik i kuqezinjve po përballej me një problem shëndetësor në mushkëri. Legjenda e Milanit, sot zv/president nderi, iu nënshtrua një ndërhyrjeje kirurgjikale mini-invazive për heqjen e një noduli të zbuluar gjatë një kontrolli rutinë, operacion që doli me sukses dhe pa komplikacione. Edhe pse rrugëtimi i kurimit nuk ka përfunduar plotësisht, prania e tij në selinë e klubit ka sjellë emocion dhe frymë pozitive te tifozët dhe drejtuesit. Disa javë më parë, Baresi u rishfaq edhe në rrjetet sociale me një foto me flamurin e Milanit dhe mesazhin domethënës “Rroftë jeta”, duke marrë qindra komente mbështetëse nga bota e futbollit dhe tifozët kuqezinj në mbarë botën.

Shorti i play off-it europian për Botërorin 2026 ka vendosur Shqipërinë përballë Polonisë dhe Kosovën kundër Sllovakisë, duke hapur një rrugë të vështirë, por jo të pamundur drejt ëndrrës amerikane. Ndeshjet gjysmëfinale luhen më 26 mars, ndërsa finalet vendimtare më 31 mars, ku kuqezinjtë mund të sfidojnë fituesin e Ukrainë–Suedi, ndërsa Dardanët, në rast kualifikimi, do të përballen me fituesin e Turqi–Rumani. Skema e plotë e shortit tregon se asnjë duel nuk është i lehtë, por për herë të parë të dy kombëtaret shqiptare janë realisht në garë për një biletë historike në Kupën e Botës.